Mō Te Kura
Ko mātou Te Aho o Te Kura Pounamu (ko Te Kura ā-Tuhi te ingoa tōmua). Ko Te Kura te kura tino rahi rawa o Aotearoa, me te whakarato akoranga mātauranga ki te neke atu i te 23,000 ākonga ia tau.
Nō te whānuitanga o ngā kapapori ā mātou ākonga, me te huhua noa o ngā hiahia ako. E noho ana i ngā wāhi katoa o Aotearoa, i tāwāhi anō hoki. E ako ana pea ngā ākonga i Te Kura hei ākonga wā kikī, hei ākonga harangotengote rānei, ā, ka noho i tā mātou rārangi ingoa mō ētahi marama, mō te katoa rānei o ngā tau e kuraina ana rātou.
He tari ā-rohe ō mātou i Te Whanganui-a-Tara, i Tāmakimakaurau, i Kirikiriroa me Ōtautahi. E mahi ana hoki ā mātou kaimahi i ngā hapori kei reira he rāpoi o ngā ākonga Te Kura, pēnei i Whāngārei, Heretaunga me Whakatū. Ka āwhina tēnei i ā mātou mahi i ngā hapori ki te tautoko i tō ngā ākonga ako.
Mā te katoa te mātauranga tawhiti ahakoa te pakeke
He kaiwhakarato mātauranga tawhiti a Te Kura e whiwhi pūtea ana i te kāwanatanga E whakarato ana mātou i te tino whānuitanga o ngā hōtaka ako me ngā akoranga kua whakawhaiarotia, ko te nuinga e whakarato tuihonotia ana, mai i te mātauranga kōhungahunga ki te NCEA Taumata 3. Ka āhei ngā ākonga te whakauru mō ētahi whiwhinga i tētahi akoranga, mō tētahi hōtaka wā kikī rānei. E tuwhera ana ki ngā ākonga katoa, mēnā ka tutuki i a koe ā mātou paearu āheitanga.
Te marautanga
E whai ana tā mātou hōtaka mātauranga kōhungahunga i te marautanga mātauranga kōhungahunga ā-motu, Te Whāriki, ā, ko te papa o tā mātou hōtaka Tau 1–13 ko te Marautanga o Aotearoa. I ngā tau 11–13 e whakarato ana mātou i ngā akoranga rēhita, whaimana, whakamana hoki i te whānuitanga o ngā marau i ngā taumata NCEA katoa.
Te ako tāwariwari
E hiahia ana koe ki te ako i hea i tēnei rā: i te kāinga? i tētahi wharekai? Kei a koe te tikanga! Ko Te Kura te kura kāwanatanga nui rawa i Aotearoa, ā, ka whakarato i te whānuitanga o ngā marau me ngā akoranga, me ngā kaimahi me ngā ākonga e noho ana, e mahi ana hoki puta noa i Aotearoa,
Te tautoko whakawhaiaro
Ka tautokona koe mā:
- te tautoko takitahi (me tō kaitohutohu ako hei āwhina i tō whakamahere i tō hōtaka ako i runga anō i ō wawata, kaingākautanga, whāinga ako anō hoki)
- ngā kaiako marau whai tohu (ka taea te whakapā mā te kōrerorero tuihono, te waea, te īmēra rānei)
- te āhei atu ki ngā hui tohutohu i ngā rohe maha (e taea ai te kōrero ki ngā kaiako me te tūtakitaki i ētahi atu ākonga).
Mēnā he ākonga wā kikī, he ākonga mātauranga kōhungahunga koe, he kaitirotiro tōu kua kōharitia ki te aroturuki i tō koke. Ko te tikanga, he matua, he whanaunga tata rānei tēnā.
Te whakapā ki ngā ākonga me ngā kaiako
Ahakoa he kura ako tawhiti Te Kura, e kore koe e noho mokemoke. Ka whai wāhi koe ki te pāhekoheko ki ētahi atu ākonga i ngā rā takahanga, ngā rā marau me ngā hui tohutohu. Ka tiritiri ariā koe me te whakawhiti i ēnei i waenga i ō kaiako me ō hoa ako mā ngā kōrerorero i Tōku Kura, tā mātou taiao ako tuihono.
Ka auau tā ngā kaiako whakapā ki a koe, taea noatia ngā hui kanohi ki te kanohi ki te hiahiatia.
Te ako pāhekoheko tuihono
E noho tuihono ana te nuinga o ā mātou akoranga, kei roto rānei he rauemi tāpiri tuihono, ina koa i ngā tau 7–13. Kei roto i tēnā, i tēnā akoranga tuihono ētahi kōwae tuihono kei roto ko ngā rauemi ataata-rongo, ngā kai roro me ētahi atu ngohe tuihono hei whakatau i tō māramatanga me te whakapakari i ō ako. Ka whai tautoko koe i ō kaiako me ētahi atu ākonga mā ngā wānanga kōrerorero e āhei ai te tiritiri ariā me te mahi ngātahi. He nui hoki ngā ngohe tuimotu.