Kuputaka

Āheitanga - Ka whakauru ērā ākonga āhei ki Te Kura me te kore utu utunga akoranga. E āhei ai, me whai wāhi rawa koe ki ētahi o ngā pūāhua e whakaahuatia ana i te kaupapahere whakauru a Te Tāhuhu o te Mātauranga mō ngā ākonga o Te Kura.

Ako whakawhaiaro - He hōtaka takitaro kua whakawhaiarotia ā ngā ākonga wā kikī, ngā ākonga utu utunga rānei, e ahu mai ana i ō rātou hiahia ake, kaingākautanga me ō rātou whāinga.

Ākonga pakeke - He ākonga e 30 ngā tau neke atu rānei i te tau akoranga. Me mātua noho koe i Aotearoa, me kirirarau hoki nō Aotearoa, me kainoho pūmau rānei o Aotearoa, o Ahitereiria rānei, ā, kia kaua koe e ako ana i tētahi atu kura tuarua. Ka āhei te pakeke te whakauru hei ākonga wā kikī, ākonga harangotengote rānei. $111 te utu mō ia akoranga.

Ākonga utu utunga - Ka taea e tētahi ākonga kāore e āhei ana ki te whakauru koreutu i raro i ngā paearu a Te Tāhuhu o Te Mātauranga, te whakauru kē hei ākonga utu utunga. Kei te āhua o tō te ākonga tūnga hei kirirarau, tōna wāhi noho, me te taumata o ana akoranga te rahi pū o ngā utu.

Akoranga - Tētahi hōtaka ako i roto i tētahi marau kei tētahi taumata marautanga, hei tauira, NCEA Ingarihi Taumata 2 (EN2000).

Aratohu Ākonga ki ngā Pōkaitaha ā-Motu - Ka whakarato mōhiohio tēnei tuhinga mō ngā paerewa paetae me te NCEA.

He kōeke waihanga mai i ētahi atu māka - Koia ko tētahi kōeke kua pūrongotia e tētahi kura ki a NZQA, he mea ahu mai i ngā taunakitanga paerewa noa, tūturu, kua tutuki i mua - arā, kua waihangatia māi i ērā atu mahi i oti i te ākonga i roto i te tau.

Hōtaka Mātauranga Takitahi (Individual Education Programme - IEP) - Kīia ai hoki tētahi IEP he Mahere Mātauranga Takitahi. Ka whakawhanakehia tētahi mā ia ākonga whai matea ako. Ka whakamārama i ngā whāinga a tētahi ākonga mō tētahi wā, me ngā rauemi me te tautoko ka hiahiatia ki te whakatutuki. Me arotake ngā IEP i ia ono marama'.

ī-ako - E whakamahi ana te ī-ako i te ipurangi me ngā hangarau whakawhitiwhitinga mōhiohio hei rauemi ako mō ngā whakawhiwhinga i waenga ākonga.

Kaiako takawaenga - Ko ngā tari mahi o ā mātou kaiako takawaenga kei ngā tari ā-rohe puta noa i te whenua, tae atu ki ngā tari ā-rohe i Ōtautahi, Kirikiriroa me Tāmaki Makaurau. Ko ā rātou mahi hei whakarato tautoko tāpiri ki ngā ākonga me ngā kaitirotiro ina hiahiatia, ko te pūtake he mea ahu mai i tētahi aromatawai ki ngā hiahia o te ākonga me te kaha o te tautoko i te kāinga.

Kaitirotiro - Ko te whakarite, me kōhari he kaitohutohu mā ia ākonga wā kikī, ia ākonga kōhungahunga hoki tērā e wātea ana ki te āwhina i a rātou puta noa i te rā. Ko te tikanga, he matua, he whanaunga tata rānei tēnei.

Kaitohutohu ako - He kaitohutohu ako tō te katoa o ngā ākonga wā kikī, ākonga utu utunga hoki. Kei taua kaiako he tirohanga whānui o te hōtaka o te ākonga, ko tāna hoki he āwhina i tā te ākonga whakarite i ōna whāinga ako.

Kāri wāhinoho - Kei tētahi taha tō wāhinoho, kei tērā atu te wāhinoho o te kura. Ina whakahoki mahi koe ki Te Kura, me whakarite kia āta kitea te wāhinoho o te kura i te peke.

Kura tuarua - Ko te whakamāramatanga a Te Tāhuhu o Te Mātauranga mō te kura tuarua, he kura mo ngā Tau 9 ki te 13. Ko te tikanga, 12 ki te 18 tau te pakeke o ngā ākonga.

Kura tuatahi - Ko te whakamāramatanga a Te Tāhuhu o Te Mātauranga mō te kura tuatahi, he kura mo ngā Tau 1 ki te 8. Ko te tikanga, e rima ki te 12 tau te pakeke o ngā ākonga.

Marau - Ko te marau he wāhanga ako, pēnei i te reo Ingarihi. Ko te tikanga, whai wāhi ai ngā akoranga kei ngā taumata rerekē ki tētahi marau. Ko te EN2000 he akoranga reo Ingarihi i te NCEA Taumata 2.

Marautanga - E kī ana te Marautanga o Aotearoa i ngā mea e whakaakona ana i ngā kura i ngā Tau 1 ki te 13.

Mātauranga kōhungahunga - Ka taea e ērā ākonga kōhungahunga e āhei ana te ako i tō mātou kura ina eke ki te toru ō rātou tau. Ko te tikanga, tīmata ai te nuinga o ngā ākonga i te kura (Tau 1) i muri i te rā whānau tuarima, engari kāore he whakaritenga kia whakauru rātou tae noa kia ono ō rātou tau. Me kōrero atu ki tō kaiako mēnā ka kōwhiri koe kia whai tonu tō tamaiti te hōtaka kōhungahunga ā muri i tōna rā whānau tuarima.

Motuhēhēnga - Ko te whakarite, me whakamotuhēhē pea ngā mahi kua tukuna kia aromatawaia mō ngā akoranga whiwhi tohu. Me haina te ākonga, te kaitirotiro hoki/rānei i te whārangi uhi ki te whakaū i mahia te mahi e te ākonga anō, me te kore whiwhi āwhina. E kī ana te whārangi uhi o te pukaiti mēnā ka whakaritea te whakamotuhēhēnga.

NCEA, te Tiwhikete o te Motu mō ngā Paetae Mātauranga rānei - ko te NCEA te tohu matua mō ngā ākonga kura tuarua kei Aotearoa. E wātea ana i ngā taumata e toru i te Anga Tohu Mātauranga o Aotearoa; Taumata 1, Taumata 2 me te Taumata 3. Mahi ai te nuinga o ngā ākonga i ngā tau 11-13 (ko te tikanga, i waenga i ngā tau 15 ki te 18).

Ngā ākonga kura paparua - Kua whakaurua ngā ākonga kura paparua ki a mātou e tō rātou kura kāinga mō ētahi hōtaka, akoranga rānei. Ko te tikanga nei, me taetae ā-tinana atu ki tō rātou kura i a rātou e whai ana i ētahi marau i tō matou kāore e whakaratohia e tō rātou kura. Ko tā mātou he whakarato i te whakareinga, te whakaterenga me te urutaunga ki ngā ākonga kura paparua, ā, ka whakarato i te reo Māori me te whakaakoranga hangarau. E whakarato ana anō hoki i ngā hōtaka kua whakahāngaitia mō ngā ākonga whai matea ako.

E whakarato ana i ngā hōtaka kura tuarua ki ngā kura:





I te taumata kura tuarua, ka mahi tahi ā mātou kaiako me te kura me te ākonga ki te whakawhanake hōtaka mō ngā ākonga kura paparua. Mō ngā ākonga whai matea ako ka taea te urutau i ngā akoranga kia ea ai aua matea. Tirohia tā mātou Marau me ngā akoranga mō ngā mōhiohio mō tā mātou e whakarato ana i te taumata kura tuarua. Mō ētahi atu mōhiohio whakapā mai.

Ngā Kaupapa Rauemi Haere Tonu (Ongoing Resourcing Schemes - ORS) - Mā ngā ākonga whai matea kaha, matea mātauranga motuhake nunui rānei.

Ngā kōeke - Ka whakamōhio ngā otinga mō ia paerewa i a koe ki te pai o āu mahi me te nui o ngā whiwhinga i whiwhi koe. Ka whakaatu te kōeke i te pai o te eke paerewa e tētahi ākonga. Ko ngā kōeke ko te N (kīhai i tutuki), A (kua tutuki), M (Kaiaka), E (Kairangi).

Ngā mahi ka aromatawaia - ko ngā mahi ka matawaia ko ngā mahi nāu i oti i ngā hōtaka me ngā akoranga i whakaurua ai e koe. Ka tirohia pea aua mahi e te kaiako ka tuhia ā-pūkete hei whakaatu i te ahu whakamua. Ka āhei te tuku i te mahi ka aromatawaia ki te kaiako mā te mēra, mā te īmēra rānei.

Ngā paerewa - Ka whakawhiwhia pea ngā paerewa puta noa i te tau kura, i ngā akoranga whakangungu ahumahi, i te mahi rānei mā tētahi whakahaere whakangungu ahumahi. E whakaatu ana ngā paerewa i tō whakaahu whakamua ki tētahi pōkaitahi ā-motu, pōkairua ā-motu rānei. Ka taea ngā paerewa te aromatawai ā-roto (arā, kāore he whakamātautau). Mō te nuinga o ngā paerewa ko ngā kōeke ko te Tutuki, Kāore i Tutuki rānei, engari mō ētahi atu ko te Kairangi, te Kaiako, te Tutuki me te Kāore i Tutuki.

Ngā paerewa paetae - Ka aromatawaia ngā ākoranga kei ngā Taumata Marautanga 6 ki te 8 (ko te tikanga, ngā Tau 11 ki te 13) ki ngā paerewa. Ka whakatauritea ō mahi ki tētahi paerewa pūmau, kāore ki ngā mahi a ētahi atu. Mēnā ka oti i a koe ngā mahi kua whakaritea, kua tutuki i a koe ki taua paerewa. E aromatawaihia ana ā-roto ētahi paerewa paetae (e mākahia ana e tō kaiako). Ki te kore e tutuki he paerewa paetae e aromatawaia ana ā-roto i tō whakamātau tuatahi, ka āhei te whakamātau anō.

Mō ngā paerewa paetae e aromatawaia ana ā-waho, ka mahi ngā ākonga o tētahi whakamātautau ā-waho i Whiringa-ā-rangi i te taha o ērā atu e ako ana i te marau ōrite. Ka taea hoki e ngā ākonga te whiwhi paerewa paetae Kaiaka, Kairangi rānei. Tirohia hoki ngā paerewa paetae.

Ka whakarato kōrero te Student Guide to National Certificates mō ngā paerewa paetae, ngā paerewa, me te NCEA.

Ngā peke tuku ā-mēra - Ka tuku mahi mātou ki ngā ākonga i roto i ngā peke ka taea te whakamahi anō. Ka tukua ētahi ki a koe hei whakamahi ki te whakahoki i ō mahi. Whakapā mai ki tō kaitohutohu ako, tō kaiako rānei ki te pau ō peke tuku ā-mēra, ngā tapanga wāhinoho rānei.

Ngā Pōkaitahi ā-Motu - Ko ēnei ngā tohu whaimana ā-motu ka whakaputahia i ngā whiwhinga kua whakawhiwhia.

Ngā ratonga tautoko ako - E whakarato ana ngā ratonga tautoko ako a Te Tāhuhu o te Mātauranga i ngā ratonga ki ngā ākonga whai matea ako.

Ngā utu akoranga - Ka utu utunga akoranga ērā ākonga kāore e āhei te whakauru i raro i ngā paearu whakauru a Te Tāhuhu o Te Mātauranga. Kei te āhua o tō rātou tūnga kirirarautanga, te wāhi e noho ana, me tō rātou taumata tau te rahi o ngā utu.

Ngā whiwhinga - Ka whiwhi whiwhinga ērā ākonga kua tutuki i a rātou ngā paerewa, ngā paerewa paetae rānei i runga i te Anga Tohu Mātauranga o Aotearoa. He whakaritenga mō te NCEA me ētahi atu pōkaitahi ā-motu te whiwhi i tētahi tapeke o ngā whiwhinga.

Pakeke mō te wehe i te kura - Kei Aotearoa nei me taetae rawa ngā ākonga ki te kura mai i te 6 ki te 16 tau te pakeke. 16 tau te pakeke ka āhei te ākonga te wehe atu i te kura. Ka āhei tētahi ākonga te wehe i te kura i te taenga ki te 15 tau mēnā kua whiwhi whakamanatanga wehe mai i Te Tāhuhu o Te Mātauranga.

Pukaiti - Te tikanga, wāhia ai ngā rauemi akoranga ki te raupapatanga pukaiti, e kapi ai i tēnā, i tēnā he kaupapa rerekē, he ngohe rerekē rānei. Kei ētahi pukaiti he wāhi e tuhituhi ai ngā ākonga i ā rātou tūmahi, e whakarite ana ētahi atu kia tuhia ērā ki tā rātou ake pepa. Mēnā he wāhi kei te pukaiti mō te tuhituhi tūmahi, whakahokia te pukaiti katoa ina oti te mahi. Ki te kore, me tango kē atu i te uhi o muri ka tuku mai i te taha o te tāpiritanga me āu ake whārangi whai tau. Puritia te toenga o te pukaiti mō ngā take whakapaipai ake.

Pūkete Paetae o Aotearoa (New Zealand Record of Achievement -RoA) - Ka whakarārangi tō Pūkete Paetae o Aotearoa i te katoa o ngā paerewa me ngā paerewa paetae i whiwhi koe mēnā kua utua ō utu ā-atu mō te NCEA.

Rārangi tatari kōhungahunga - Ka tuhia ki tētahi rārangi tatari ērā kōhungahunga kua whakaaehia e Te Kura mō te whakauru, engari kāore anō kia eke ki te toru tau, mō ērā rānei kāore anō kia wātea he tūranga i te wāhanga mātauranga kōhungahunga. Ko te tikanga, ka whakaurua ngā kōhungahunga e tatari ana ki te kura e ai te raupapa o ō rātou tau.

Ratonga Kaiwhakarere Kura Whakauru Kore (Non-enrolment Truancy Service - NETS) - Ko tā ngā āpiha aru kaiwhakarere kura he kimi i ngā taiohi kei raro i te 16 tau kāore e taetae ana ki te kura. Ka āwhina a NETS i ngā taiohi ki te whakauru anō ki te kura, te whai wāhi ki te whakangungu, te haere ki te mahi rānei.

Rōpūtanga tūmanakohanga - Ka whakaatu te rōpūtanga tūmanakohanga i ngā mea e kimihia ana e tō kaiako, kaitohutohu ako rānei ina aromatawai i ō mahi. Ka āhei te takitaki i te rōpūtanga tūmanakohanga i mua i te whakahoki i ō mahi hei whakarite kāore koe i wareware ki te whakauru i tētahi mea me whakauru. Tērā pea ka kōrero te rōpūtanga tūmanakohanga mō ngā taumata rerekē o te kounga, ā, mō ngā whakaritenga hei whakatutuki i tēnā me tēnā.

Taiohi - 16 ki te 19 ngā tau o ngā ākonga kei tēnei kāwai, ā, kāore e whakaurua ki tētahi anō kura. Ka āhei ngā taiohi ki te whakauru koreutu.

Tau 1-6 - E ōrite ana ēnei tau kura tōmua ki ngā karaehe teina o mua. Ko te Marautanga o Aotearoa te papa mō te hōtaka ako, ā, e mahi ana ngā ākonga wā kikī i ngā wāhi ako e waru: te hauora, ngā toi, ngā tikanga ā-iwi, te hangarau, te pūtaiao, te pāngarau me ngā reo. Ka āhei ngā ākonga Tau 1 ki te 6 te whakauru hei ākonga kura paparua.

Tau 11-13 - E ōrite ana ēnei tau kura ki ngā reanga 5 ki te 7 o mua. E aromatawaia ana ā-roto ngā ākonga i ngā Tau 11 ki te 13 puta noa i te tau, ā, ka mahi pea i ngā whakamātautau ā-waho mō te NCEA i ngā marama o Whiringa-a-rangi me Hakihea.

Taumata - Kei te āhua te taumata marautanga e mahi ana tō ākonga o ōna pūmanawa me ōna akoranga tōmua. E waru ngā taumata o te marautanga. Ka pau pea neke atu i te tau kura kotahi te whakaoti i tētahi taumata marautanga.

Te ako kōmitimiti - Ka whai te nuinga o ngā ākonga kei ngā tau 7 ki te 10 i te hōtaka ako kōmitimiti e kīia ana ko Te Ara Hou. He hōtaka ako whakawhaiaro tō ia ākonga e ahu mai ana i ō rātou hiahia ako, kaingākautanga me ā rātou whāinga.

Te Ara Hou - he hōtaka kōmitimiti Te Ara Hou mā ngā ākonga Tau 7 ki te 10. Ka kapi i ngā kōwae mahi ētahi marau e rua neke atu rānei, me ētahi wāhi ako motuhake anō hoki.

Te whakamana i te wehenga i te kura mō ngā ākonga 15 ō rātou tau - 16 tau te pakeke e taea ai e te ākonga te wehe i te kura i Aotearoa. Ka āhei ngā matua whai tamariki 15 ō ratou tau te tono whakamanatanga wehe wawe i te kura i Te Tāhuhu o Te Mātauranga. E tuku ana tēnei kia whakauru ana te ākonga ki tētahi momo whakangungu, te tīmata rānei i tētahi mahi wā kikī.

Tōku Kura - Koinei te taiao tuihono o Te Kura me te whakaako me te ako e āhei ai ngā ākonga me ngā kaiako te whakawhitiwhiti kōrero i roto i te akomanga mariko.

Tomokanga - Ko te Tomokanga he hōtaka ako ā-mahi, kua āta hangaia, mā ngā ākonga wā kikī kei ngā tau 11 ki te 13 e noho ana i Aotearoa.

Wāhanga - Ka wehea Te Kura ki ngā wāhanga (wehenga) e toru. Ka whai wāhi ngā kaimahi katoa ki te wāhanga Ako me te Whakapuaki. E aro ana te wāhanga Hoahoa me te Kounga ki te whakaputa me te horahora i ngā rauemi whakaako me te ako. Ka whai wāhi ki Ngā Ratonga Pūmanawa Ngā Ratonga Whakauru, te Ōhanga, Ngā Pūmanawa Tangata, Ngā Ratonga Tari me te Hokohoko, te Rōpū Rauemi Mōhiohio, ngā Whakatutukinga Whakahaere, te Whakamahere me te Pūrongo.

Whārangi uhi - Ko te uhi kei muri i ngā pukaiti mahi akoranga te whārangi uhi. Mēnā ka whakarato mokowā tō pukaiti i ngā whārangi ki te whakaoti tūmahi, whakahokia te pukaiti katoa ki tō kaiako. Mēnā ka tuhituhi i ō tūmahi ki tāu ake pepa, tangohia te whārangi uhi i te pukaiti, ka whakahoki atu me te tāpiri ki ō mahi ā-tuhi. Me mahara ki te whakarite kia whai tau ō whārangi.